O Porto de Vigo suspenderá o tráfico marítimo entre as 16.30 e 18.30 horas deste domingo debido ao dispositivo de seguridade e o gran número de embarcacións esperadas pola saída da regata A Solitaire du Figaro Paprec, ademais dos 34 veleiros participantes.
A suspensión aplicarase unicamente durante dúas horas para garantir a seguridade dos participantes e da organización da regata. A través dun comunicado, o Porto recomenda a todos os usuarios do porto tomar as medidas oportunas para axustar as súas operacións fóra deste horario.
Por outra banda, a Autoridade Portuaria abrirá o Peirao de Transatlánticos á cidade durante a celebración da regata para que vigueses e visitantes poidan seguir de preto a saída. “Trátase dunha oportunidade única para despedir aos regatistas e gozar dun espectáculo deportivo de primeiro nivel desde un lugar privilexiado”, explica.
A saída dos 34 regatistas participantes na 56ª edición da A Solitaire du Figaro Paprec está prevista ás 17.00 horas e será retransmitida en directo pola Televisión de Galicia (TVG). Iso significa que os primeiros barcos largarán amarras da dársena de Portocultura a partir das 14.00.
Tras abandonar os pantanales da dársena, terán por diante un percorrido de 612 millas (1.133 km) de navegación entre Vigo e Saint-Vaast-A-Hougue, en Normandía, onde terá lugar a gran chegada desta 56ª edición.
