A cidade de Vigo sumarase este sábado ás mobilizacións de apoio á Flotilla Global Sumud, que pretende romper o bloqueo en Gaza e levar axuda humanitaria á poboación palestina, vítima do xenocidio perpetrado por Israel.

A Plataforma Cívica Prol-Palestina da cidade olívica, integrada por asociacións, partidos políticos, sindicatos e outros colectivos, impulsa deste xeito unha marcha de apoio que terá lugar na tarde do sábado, na praia da Fonte, en Samil, ás 17.00 horas. Igualmente, está prevista unha regata pola mañá (ás 11.00 horas) para trasladar así o apoio á Flotilla por terra e por mar.

Estas accións forman parte dunha mobilización internacional convocada por Movemento Global para Gaza, co fin de romper o bloqueo e visibilizar o xenocidio. Así, a Flotilla reúne delegacións de 44 países e persegue a apertura dun corredor humanitario ante a “inacción cómplice” de gobernos e institucións internacionais.

Desde a Plataforma fíxose un chamamento a toda a cidadanía para que participe nos actos deste sábado, e subliñou que “a unidade na loita solidaria e a acción descentralizada nos territorios son ferramentas imprescindibles fronte á barbarie colonial sionista”. “Porque non hai paz sen xustiza, porque o silencio mata, porque Palestina vive nas nosas loitas. Desde Vigo ata Gaza, sumámonos á flotilla da dignidade”, proclamaron.