Resposta Feminista pediu este luns o traslado ao hospital Meixoeiro de Vigo o servizo de reprodución asistida, que actualmente se atopa na rúa Pizarro, ante a súa “paralización” por falta de espazo. En rolda de prensa, o colectivo denunciou a situación de “parálise” na que se atopan as medidas comprometidas no Plan galego de reprodución humana asistida 2024-2028 aprobado polo Servizo Galego de Saúde (Sergas).
Este plan inclúe, segundo dixeron, “importantes melloras” para os dereitos reprodutivos das mulleres, como a ampliación progresiva da idade máxima de acceso ás técnicas de reprodución asistida, desde os 40 ata os 45 anos, así como a conxelación de óvulos entre 30 e 35 anos sen patoloxías.
“Pero este plan non se está implementando na súa totalidade polo grave problema de espazos e persoal. A actual unidade situada no anexo do Hospital Xeral é insuficiente e xa non ten quirófanos nin espazos no laboratorio suficientes para os novos equipos, polo que limita a ampliación do servizo e as prestacións”, apostilou Alba Alvar, portavoz do colectivo.
Segundo lembrou, este traslado xa estaba recollido no plan funcional da área Sanitaria de Vigo e foi anunciado en 2023, pero “nunca se fixo efectivo”. “Unha vez máis, vemos como os recursos relacionados coas mulleres quedan para o final e nunca son prioritarios. Por outra banda, esta deficiencia no servizo deriva en que a demanda no negocio privado aumente, xerando desigualdade e mercantilizando nosa capacidade reprodutiva”, engadiu, indicando que moitas mulleres superan a idade antes de que poidan acceder a unha cita.
OBRAS
Así mesmo, informaron que as obras que se levarán a cabo no centro farán que a partir deste martes e ata o 17 de agosto deixarase de prestar o servizo. Segundo lles trasladaron as traballadoras do centro, os traballos pretenden ampliar espazos para permitir a instalación dunha parte dos novos aparellos. Con todo, Resposta Feminista considera que esta ampliación é “insuficiente” para garantir un servizo público de calidade. Ademais, durante os meses de peche “non se vai a derivar o servizo a ningún outro centro, excepto nos casos urxentes”, o que incrementará, ao seu xuízo, as listas de espera.
