Un home acusado dun delito de falsidade en documento privado aceptou 6 meses de prisión tras recoñecer os feitos, nunha vista de conformidade celebrada na sección quinta da Audiencia Provincial de Pontevedra, con sede en Vigo.

Inicialmente, a Fiscalía pedía un ano e medio de cárcere, pero houbo un acordo e, tras o recoñecemento dos feitos, o procesado aceptou a pena de 6 meses de prisión. Dita pena queda suspendida por un período de 2 anos, a condición de que o home non delinca nese tempo.

Segundo recolle o escrito de acusación pública, o procesado presentou en outubro de 2023 unha demanda de modificación de medidas, solicitando un réxime de garda e custodia compartida da súa filla, alegando múltiples circunstancias a favor desa custodia compartida.

Así, referíase a a idade da menor, a vontade da mesma e un horario compatible cunha maior dedicación á filla común que tiña coa parte demandanda. Entre os documentos que achegou o acusado, había un xustificante dunha academia de formación de Cartaxena que acreditaba que o home impartía cursos de informática como traballador fixo descontinuo. O acusado “nunca chegou a impartir tales cursos, estando só anotado na bolsa de traballo” do centro, pero falsificou o xustificante da devandita academia.