A Valedora do Pobo admitiu a trámite dúas queixas do PP de Vigo pola negativa do goberno de Abel Caballero de informar os atrasos na área de Benestar Social.

Nun comunicado, o grupo municipal ‘popular’ denunciou este mércores a absoluta “falta de transparencia” do rexedor á hora de informar os problemas que arrastra, ao seu xuízo, o servizo de Benestar Social.

Unha “opacidade” que levou á Valedora a admitir dúas queixas do PP pola negativa do goberno local de facilitar detalles sobre as listas de espera, as axudas económicas pendentes de trámite, as reclamacións recibidas, os informes de dependencia e discapacidade sen completar ou a situación na que se atopa o Servizo de Axuda non Fogar, entre outras cuestione.

Para o concelleiro do PP Fernando González Abeijón, o mesmo Caballero que esixe transparencia a outros, “négase sistematicamente a render contas sobre como se xestionan en Vigo os servizos sociais”, a pesar de que o PP pediu os datos o pasado mes de abril, sen que houbese resposta.

Así, tras notificar o sucedido á Comisión de Transparencia de Galicia e a Valedora do Pobo, o organismo que preside Dores Fernández Galiño abriu dous expedientes para esixir ao Concello que achegue a información nun prazo máximo de 15 días.