As familias do CEIP Emilia Pardo Bazán de Vigo denuncian que a expulsión dun neno con necesidades educativas de 6º de Infantil (5 anos), por presentar condutas agresivas, débese a que a Xunta non dotou ao centro dun profesor de pedagoxía terapéutica (PT).
Os pais e nais do colexio relatan nun comunicado que o menor “non sabe controlar a rabia e agride aos seus compañeiros e docentes”. Trátase dun “neno moi pequeno cunha necesidade educativa clara que non se está atendendo como se debe”, o que xera “unha situación complicada” para el mesmo, os seus compañeiros e as familias.
As familias acudiron á dirección do CEIP e á Inspección da Consellería de Educación. Con todo, fontes deste departamento consultadas por Europa Press consideran que o colexio “xa conta cos recursos adecuados” e que na súa aula “só hai 13 alumnos escolarizados, moi por baixo dos 25 máximos” que contemplan os cocientes.
Neste contexto, as familias insisten en que “a realidade na aula demostra o contrario”, porque este alumno “necesita un apoio específico e non o ten”. Así, culpan á Xunta de non dotar deste reforzo, polo que o centro, “véndose sen recursos”, decidiu expulsalo temporalmente.
Os pais e nais consideran que esta medida “non axuda nin ao pequeno, nin aos seus compañeiros, nin ao profesorado, xa que é unha medida agresiva e con consecuencias negativas” para logo volver integralo en clase. En todo caso, a Consellería insiste en que Inspección “está ao tanto da situación” e fai “un seguimento do alumno en colaboración co propio centro”.
