O acusado de asasinar a un okupa co que convivía en Vigo asegurou que non estaba enfadado coa vítima no momento dos feitos e apuntou a que o falecido e un terceiro compañeiro de habitaba a casa si estaban encabuxados. Así o sinalou durante a súa declaración no primeiro día do xuízo con tribunal de xurado por este caso que leva a cabo durante toda esta semana na sección quinta da Audiencia Provincial de Pontevedra, con sede na cidade olívica.
O home, para o que Fiscalía pide ata 20 anos de prisión por un delito de asasinato con aleivosía por supostamente acoitelar e matar ao outro home, só contestou ás preguntas da súa avogada. Segundo o seu relato dos feitos, todo ocorreu na madrugada do 17 de xullo de 2023. Tras saír de traballar foi á festa de Bouzas, onde se atoparía co falecido, o cal estaba só e bébedo. Tal como explicou, era unha persoa con problemas de alcol e púñase agresivo cando bebía.
Nun momento dado, fóronse xuntos da festa andando, chegando a Praza da Industria, onde o procesado quedou nun banco durante uns 20 minutos, mentres a vítima marchou por outro camiño. Cando o acusado chegou á casa que okupaban “non había ninguén”, relatou. Despois, chegaría o terceiro inquilino da vivenda, que lle agarraría a man e diríalle que apuñalaran ao outro home. Por iso, foron á rúa e atoparon ao falecido. Ademais, asegurou que viu como este terceiro home se limpaba as mans cos seus propios ouriños.
Preguntado sobre se discutira coa vítima, como defende Fiscalía, o acusado asegurou que non, pero que si tiña coñecemento de que o falecido e o terceiro inquilino da casa si tiveran un enfado. A vista continuará esta tarde e durante toda a semana. O caso provén do Xulgado de Instrución número 4 da urbe e, segundo o escrito de acusación do Ministerio público, o home é autor dun delito de asasinato con aleivosía, ao acoitelar e matar á vítima.
FEITOS
En concreto, sempre segundo Fiscalía, os feitos ocorrerían na madrugada do 17 de xullo de 2023, cando o acusado e o falecido volvían camiñando xuntos desde as festas do barrio de Bouzas ata o domicilio que ambos os okupaban. Na contorna da praza da Industria, tras unha discusión, continuaron o camiño por separado. Foi sobre as 03.20 horas cando se reencontraron no exterior do domicilio. Alí, o acusado, utilizando un coitelo de máis de 28 centímetros que collería no interior da vivenda, atacaría á vítima, cravándollo ata en catro ocasións nas costas, no tórax, no peito e no brazo.
Fiscalía considera que o acusado “actuou coa intención de acabar coa vida” da vítima, a cal “dado o seu profundo estado de embriaguez e o sorpresivo do ataque, non tivo posibilidade algunha de repeler a agresión”. A vítima, tras o apuñalamento, apenas puido camiñar 200 metros ata a rúa Coruña, onde faleceu “por un shock hipovolémico como consecuencia das feridas de arma branca, sendo a última delas mortal e incompatible coa supervivencia, ao penetrar a cavidade torácica, perforar o saco pericárdico e penetrar no corazón”, recolle Fiscalía, pedindo 20 anos de prisión para o acusado, así como o pago dunha indemnización á nai do falecido de 60.000 euros.
