Ecoloxistas en Acción insistiu este martes en que a Factoría do Deporte Galego-Galicia Sports 360 que o Real Club Celta de Vigo está a desenvolver en Mos é un “pelotazo urbanístico” en terreos forestais.

Así o sinalou nun comunicado tras coñecerse este luns que a Xunta declarou estas infraestruturas como de interese autonómico, a pesar de que supón unha recualificación de chan rústico non urbanizable a urbanizable, segundo lamentan os ecoloxistas.

“É un pelotazo urbanístico en toda regra e unha apropiación de monte comunal, coa consecuente perda de arboredo e biodiversidade, para entregalo a un proxecto privado, non a unha obra de interese pública, como un hospital”, criticou o portavoz de Ecoloxistas en Acción, Xaquín Pastoriza.

Para el, aínda que é certo que o proxecto final supón unha rebaixa “moi importante” con respecto ao primeiro presentado, esta actuación debería desenvolverse nunha zona urbanizada cualificada para dotación deportiva e non nunha zona forestal.