O alcalde de Vigo, Abel Caballero, confirmou este venres que o Concello xa recibiu o último informe que faltaba para aprobar o novo Plan Xeral de Ordenación Municipal (PXOM) da cidade, o da Dirección de Costas do Estado, e que é “absolutamente favorable”. En declaracións remitidas aos medios, o rexedor celebrou esta “boísima noticia” e avanzou que “dentro dun mes, aproximadamente” o novo Plan Xeral estará aprobado, e destacou que ten “todos os informes preceptivos favorables”.
Nas próximas semanas, explicou, o equipo redactor preparará o documento definitivo, incorporando todo o que aparece nos informes. “Dentro dun mes aprobarase a PXOM mellor que tivo nunca Vigo en toda a súa historia. Un plan para facer vivendas alcanzables, para vivendas a prezo taxado, para zonas verdes, para ámbitos dotacionais, pavillóns deportivos, espazos culturais,… todo o que sempre quixemos”, proclamou.
HUMANIZACIÓN DE CLARA CAMPOAMOR
Por outra banda, Caballero tamén informou da aprobación en Xunta de Goberno do proxecto de humanización da Avenida Clara Campoamor, entre a rúa Ramiro Pascual e o hospital Álvaro Cunqueiro, cun investimento de 1,23 millóns de euros. As obras comezarán a finais de verán e durarán uns 5 meses e o alcalde destacou que se renovará a calzada, faranse beirarrúas e cambiaranse as redes de servizos, saneamento e abastecemento, ou a iluminación. “Unha obra magnífica que tería que facer a Xunta. Na Coruña, exactamente o mesmo, os accesos aos hospitais, fainos a Xunta, e aquí teno que facer o Concello”, queixouse o rexedor.
A vicepresidenta da Deputación de Pontevedra e concelleira do PP en Vigo, Luisa Sánchez, respondeu ás críticas do alcalde lembrando que esa obra está financiada en máis do 80 % pola institución provincial. En declaracións remitidas aos medios, Luisa Sánchez, sinalou que a “ocultación” dos investimentos da Deputación en Vigo é habitual por parte de Abel Caballero, mentres que, cando a presidenta provincial era a socialista Carmela Silva, pregoábaas. “Pero o seu sectarismo político pódelle tanto que agora foi máis aló. Ataca ao PP pola reforma da Avenida Clara Campoamor… pero se a Deputación de Pontevedra financia o 86 %! Se eu mesma como vicepresidenta dei o visto e prace a esa actuación!”, proclamou Sánchez, que criticou que “cando se trata de enganar á cidade e aos medios, o alcalde é capaz de superarse a si mesmo”.
