O alcalde de Vigo, Abel Caballero, anunciou que a xunta de goberno local aprobou as bases da convocatoria da oferta de emprego público (OPE) dos anos 2020, 2021 e 2022, que inclúen 19 prazas de funcionarios. Nun audio difundido aos medios de comunicación, o rexedor indicou que estas vacantes inclúen, entre outros postos, un analista informático, economistas, enxeñeiros de camiño, enxeñeiros industriais ou programadores informáticos.

Segundo dixo, esta OPE ten como obxectivo “seguir prestando o mellor servizo á cidadanía”, polo que se busca persoal formado e “capaz de estar na administración dunha das grandes cidades de Europa, que é Vigo”. Noutra orde de cousas, Caballero informou de que o goberno local investirá uns 40.000 euros en diferentes cursos de formación, que inclúe propostas no ámbito de deseño de xardíns, así como do ámbito social e novas tecnoloxías, entre outros.

Así mesmo, a xerencia de urbanismo aprobará este martes de forma definitiva o proxecto de compensación da Unión de Execución Industrial de San Andrés de Comesaña. Tras a aprobación do PERI hai meses, agora validarase o proxecto de compensación para determinar o destino final, a repartición e as características edificatorias de cada parcela.