O Concello de Vigo e Central de Radio Taxi volverán este ano a ofrecer viaxes gratuítas para usuarios de centros de maiores, para que percorran as rúas do centro da cidade e poidan ver a iluminación, a árbore de Porta do Sol e outros elementos decorativos. A iniciativa desenvolverase por sexto ano e terá lugar o próximo 17 de decembro, día en que os participantes serán recollidos nos seus centros polos taxis desta Central para percorrer as rúas de Vigo. Segundo explicaron o alcalde, Abel Caballero, e o presidente de Central Radio Taxi de Vigo, Emilio Mosquera, poranse a disposición destes viaxeiros 42 vehículos, e a previsión é trasladar a unhas 200 persoas, residentes en 20 centros de maiores da cidade.