A Xunta investirá un orzamento de case 1,8 millóns de euros nas obras que completarán a humanización da travesía interior de Sabarís, en Baiona. A conselleira de Vivenda e Planificación de Infraestruturas, María Martínez Allegue, visitou este sábado a contorna onde se vai a desenvolver a actuación, que realizarán mediante un convenio co Concello que asinarán en xaneiro.

Segundo informou a Xunta, os traballos enmárcanse na liña de cooperación que impulsa o Executivo galego cos concellos para accións de mellora de contornas urbanas. “Son actuacións de humanización que xogan un papel fundamental para a posta en valor dos pobos e para dinamizalos social e economicamente”, remarcou a conselleira.

Desta forma, abordarán a humanización do tramo de 1,1 quilómetros da rúa Julián Valverde, desde o cruzamento coa rúa José Pereira Troncoso ata a rotonda da rúa Porta do Sol, e completarán así un itinerario peonil accesible de dous quilómetros, ao conectar con tramos xa executados noutro tramo da rúa Julián Valverde, así como en Porta do Sol e en Areas.