Un veciño de Vigo aceptou este martes a pena dun 1 ano e 3 meses de cárcere como autor dun delito de posesión e distribución de pornografía infantil, nunha vista de conformidade celebrada na sala do Penal 2 da cidade olívica. Segundo se recolle no escrito de acusación da Fiscalía, os feitos recoñecidos polo procesado tiveron lugar no ano 2022, cando os investigadores tiveron coñecemento de que, desde un computador dun veciño da cidade, estaba a distribuírse contido audiovisual de pornografía infantil.
Unha vez identificada o IP do usuario, realizouse unha entrada e rexistro no domicilio do acusado, onde se atoparon un computador con dous discos duros, outro disco duro externo, tres memorias USB e dous portátiles, entre outros efectos. Na análise dos equipos localizáronse máis de 850 arquivos (vídeos e imaxes) de contido pedófilo, con escenas sexuais explícitas de menores, e con adultos.
Por estes feitos, a Fiscalía pedía inicialmente unha pena de 3 anos de prisión, aínda que tras o acordo, a condena reduciuse a 1 ano e 3 meses. Igualmente, o procesado foi inhabilitado para exercer profesión ou oficio que implique trato directo con menores por un período de 3 anos e 3 meses. A xuíza acordou a suspensión da execución da pena por un período de 2 anos, a condición de que o procesado non delinca nese tempo.
