O BNG reclamou 144 millóns de euros máis para Vigo no proxecto de Orzamentos da Xunta de Galicia para 2025 e pediu que se poña fin ao “total abandono” da cidade.
Así, os nacionalistas presentaron 41 emendas parciais ás contas autonómicas para tratar de terminar coa “política de total abandono coa que o PP castiga á cidade desde hai 15 anos” e así converter Vigo no “motor dunha nova Galicia”.
“Esta política de castigo do PP coa maior cidade galega foi masivamente rexeitada polos vigueses nas pasadas eleccións galegas nas que o PP foi derrotado e o BNG converteuse na primeira forza”, subliñaron desde o Bloque, segundo recollen nun comunicado.
Nas súas emendas, o BNG propón unha batería de medidas para “afrontar a crise industrial, reverter a privatización sanitaria, responder ao grave problema da vivenda, desenvolver infraestruturas pendentes, avanzar na sustentabilidade ambiental e apoiar ao tecido cultural e o deporte vigués”.
“O obxectivo é que Vigo volva ser un potente pulmón industrial e produtivo de Galicia. Converternos na capital galega da innovación, da tecnoloxía e das comunicacións. Volver estar á vangarda cultural e asumir o papel que nos corresponde como maior cidade galega”, subliñou o portavoz municipal do Bloque, Xabier Pérez Igrexas, que estivo acompañado esta mañá polos deputados vigueses Alexandra Fernández, Carmela González e Brais Ruanova.
