Os estudantes galegos sumáronse este martes á folga nacional convocada polo Sindicato de Estudantes en apoio aos afectados pola DANA, e concentráronse en Vigo e A Coruña para esixir responsabilidades políticas e a adopción de medidas de protección para as persoas que o perderon todo.

Así, na cidade olívica, un grupo de mozos reuniuse ao redor do Farol de Urzáiz con Colón para trasladar o seu apoio aos estudantes de Valencia e o resto de rexións afectadas polo temporal de hai unha semana.

A portavoz do Sindicato de Estudantes, Nerea Pereira, explicou que as concentracións reivindicativas, ademais da mensaxe de apoio, pretenden demandar a dimisión do presidente da Comunidade Valenciana, Carlos Mazón e o seu equipo, como responsables políticos “de tantas mortes, sufrimento e dor”.

Igualmente, esixiron medidas urxentes do Goberno central para garantir atención médica gratuíta a todos os afectados e que se poñan a disposición todos os recursos do Estado para paliar esta “catástrofe”. Entre as medidas que piden os estudantes, está tamén a intervención de hoteis e pisos turísticos para garantir aloxamento ás familias afectadas pola DANA, e “que se tomen medidas enérxicas contra o cambio climático e a destrución do medio ambiente”.