O alcalde de Vigo, Abel Caballero, fixo balance este xoves dos danos que o temporal Kirk causou á masa arbórea da cidade, e confirmou que as choivas e o vento afectaron a 218 árbores.

Segundo explicou nunhas declaracións remitidas aos medios, a zona máis afectada polas incidencias foi o paseo do río Lagares, onde se rexistraron 75 contratempos e caéronse 40 árbores. Esta situación deixou zonas do paseo intransitables.

O rexedor explicou que o Concello xa está a proceder á retirada das árbores e as ramas tombadas polo temporal, e tamén se está actuando sobre outras árbores e elementos vexetais que, tanto nesa zona como noutras da cidade, quedaron danados ou inclinados, para evitar riscos.

Finalmente, Abel Caballero asegurou que o Concello reporá as árbores que caeron no paseo fluvial e remarcou que, nesa zona, están a plantarse “780 árbores e arbustos”. “Desde que son alcalde, temos o maior nivel de plantación de árbores que houbo nunca, e ímolo a acelerar”, proclamou.