O Goberno trasladou, nunha resposta á senadora do BNG Carme da Silva, a súa intención de adoptar as “medidas que sexan necesarias” para garantir o acceso público á illa de Toralla, situada fronte á praia de O Vao, en Vigo, e conectada con terra mediante unha ponte.
Na súa resposta, a Dirección Xeral da Costa e o Mar expón que é “consciente das limitacións” de acceso á illa, e sinala que traballa “nunha solución para revertelas”.
Tras aclarar que “non consta a existencia” dun proxecto para recuperar o dominio público marítimo terrestre e a apertura do tránsito nesa illa (anunciado pola entón ministra Elena Espinosa), a Dirección Xeral sinala que “a habilitación da servidume de tránsito na illa de Toralla é un dos obxectivos presentes”.
Respecto diso, lembra que lei obriga a establecer unha franxa de 6 metros de servidume, e que esa zona deberá quedar permanentemente despexada para o paso público peonil e para vehículos de vixilancia e salvamento (excepto en espazos especialmente protexidos).
“O Ministerio para a Transición Ecolóxica e o Reto Demográfico vai adoptar as medidas necesarias para que a illa de Toralla sexa de accesibilidade pública de acordo co contemplado na normativa de Costas”, conclúe o Goberno na súa resposta.
A senadora nacionalista, Carme da Silva, celebrou este “acordo” e agradeceu aos veciños e colectivos ecoloxistas que “nunca se renderon” na súa loita por recuperar ese espazo.
Ante esta resposta, o portavoz municipal do BNG en Vigo, Xabier Pérez Iglesias, reivindicou o acceso público á illa como unha “débeda histórica” coa cidade. “Non podemos aceptar que continúe sendo o coto VIP duns poucos, incumprindo a lei”, advertiu o edil.
Así mesmo, advertiu de que o BNG “vai seguir exercendo presión” para que o Goberno cumpra co compromiso de recuperar Toralla, tras anos de ser unha “illa privatizada”, nos que a administración central contou coa “complicidade do goberno municipal e da Xunta”.
