As obras de humanización da fachada portuaria de Vigo, entre Areal e Bouzas culminarán en decembro de 2024, data na que estará rematada a última fase desta actuación, cofinanciada polo Porto e a Xunta (con cargo a fondos europeos).
Así o confirmaron o presidente do Porto, Carlos Botana, e a conselleira de Vivenda e Planificación de Infraestruturas, María Martínez Allegue, que este venres supervisaron os traballos do tramo que vai desde a rotonda de Industrias Conserveiras ata Bouzas, o último que falta para terminar esta actuación, que contou cun investimento global duns 15 millóns de euros (dos que a Xunta pon, de fondos UE, 3,5 millóns) para unha obra realizada en máis de 7 quilómetros.
Este último tramo supón a reforma das beirarrúas, pavimento, mellora da mobilidade e instalación de bancos, árbores, paneis informativos ou aparcadoiros para bicis ao longo de 1,4 quilómetros. Nesta parte da actuación inclúese tamén a construción dunha pequena praza-miradoiro cunha pérgola e bancos na Avenida de Beiramar, á beira dos estaleiros Cardama.
Deste xeito, a finais deste ano quedará concluída toda a reforma da fachada portuaria, que tamén incluíu actuacións en Areal, As Avenidas e o Paseo dos Peixes da terminal de coches de Bouzas. O trazado optará tamén a converterse en Carreiro Azul.
A conselleira destacou que esta reforma “era necesaria para Vigo”, e permite non só unha conexión continua entre Areal e Bouzas permeable, senón que supón poder compatibilizar os usos portuarios e industriais co goce para os cidadáns.
Martínez Allegue subliñou que a colaboración da Xunta nesta obra é outro exemplo da “aposta por Vigo” que fai o goberno galego, e lembrou que dita aposta evidénciase tamén noutras actuacións, como a reforma da Avenida de Galicia, a construción de vivendas públicas en Navia ou a construción do Centro Integral de Saúde Olimpia Valencia.
Pola súa banda, o presidente do Porto, Carlos Botana, incidiu en que a reforma da fachada marítima “marca un cambio” para o organismo portuario, porque permite a súa integración na cidade e avanzar cara á sustentabilidade. Ademais, valorou que este tramo permitirá aos cidadáns achegarse á historia da industria naval ou conserveira de Vigo e do propio porto.
