O Concello de Vigo sinalou este venres que “se viu obrigado” a resolver favorablemente a petición de autorización da futura gasolineira da Baixada Pontillón, por detrás do Parque de Castrelos, ao dispor de todas as autorizacións preceptivas necesarias.
Nun comunicado, o goberno local subliñou que o outorgamento de licenzas é un acto “regulado” e “en absoluto suxeito a discrecionalidade algunha”. “O Concello viuse obrigado a resolver favorablemente a petición de autorización dunha actividade económica cun uso autorizado en chan rústico pola Lei do Chan de Galicia de 2016”, engadiu. Esta licenza foi outorgada debido a que a unidade de subministración de combustible solicitante, Pleonil, obtivo todas as autorizacións preceptivas, segundo indica o goberno local.
En concreto, dispuña do informe favorable de cumprimento da normativa de seguridade industrial para a estación de servizo da Xefatura Territorial de Pontevedra; o da Axencia Estatal de Seguridade Aérea; o da Dirección Xeral de Patrimonio Cultural; o cumprimento da Declaración de Incidencia Ambiental da Consellería de Medio Ambiente; o informe favorable da Dirección Xeral de Augas de Galicia, e o do Servizo de Seguridade e Mobilidade do Concello. “O Concello de Vigo, por tanto, está obrigado a emitir licenza favorable para esta instalación, en cumprimento da legalidade á que están sometidas este tipo de decisións”, sentenciou o goberno municipal.
PROTESTAS
Todo iso tras semanas de protestas en Vigo pola instalación desta gasolineira a escasos metros do Parque de Castrelos e do río Lagares. Nunha zona, ademais, de gran afluencia de vehículos e reiterados atascos. Precisamente este venres, o BNG de Vigo pediu prohibir a instalación de gasolineiras a menos de 250 metros de vivendas. Nun comunicado, os nacionalistas insistiron na suspensión da licenza deste establecemento no Pontillón. “A concelleira de Urbanismo non respondeu aínda ás enormes dúbidas legais desta gasolineira proxectada nunha parcela rústica e afectada por un PERI”, lamentou o portavoz do BNG, Xabier Pérez Igrexas.
