O goberno de Vigo asegurou este mércores que os grupos da oposición tiveron este martes, día 13 de agosto, acceso “á totalidade da información da que dispón o Concello en relación ás festas de Matamá e a atracción do Saltamontes”, aínda que o resto de partidos políticos aseguraron que “mente”.

Nun comunicado, o goberno municipal subliñou que facilitou o acceso á “totalidade da documentación” que figura nos expedientes que solicitaron tanto o PP como o BNG.

Todo iso despois de que o BNG acusase o goberno local de impedir o acceso á documentación do accidente mortal ocorrido no Saltamontes das festas da parroquia de Matamá na madrugada do sábado 3 de agosto, preguntándose “que é o que pretende esconder”. Así, indicaban que o Concello xa superara o prazo máximo de cinco días para permitir o acceso unha vez solicitado.

Este mércores, tras o comunicado do Concello, o BNG saíu ao paso asegurando que o goberno local “mente” e que, “a día de hoxe, aínda non se recibiu ningunha comunicación, resolución ou habilitación de acceso a ningunha información, documentación ou expediente solicitado”.

Pola súa banda, o PP de Vigo aclarou que, na tarde deste martes (tras as críticas do BNG), deuse acceso a un “único expediente” que se corresponde á tramitación administrativa da atracción accidentada.

“Un expediente no que non figura a resolución na que se desautorizou a súa posta en funcionamento nin a correspondente comunicación á comisión de festas. Tampouco ningún informe ou actuación policial que teña relación coas supervisións e os controis das atraccións non autorizadas na festa, que tamén solicitamos”, indican os ‘populares’ nun comunicado.