A Consellería de Vivenda e Planificación de Infraestruturas publicou este mércores no Diario Oficial de Galicia (DOG) a resolución das porcentaxes de reserva de chan para vivenda protexida correspondente ao ano 2024 (de municipios de máis de 5.000 habitantes), que sitúan a Mos e a Vigo á cabeza.

En concreto, a media galega sitúase no 7,64 %, pero esta cifra alcanza o 21,16 % no caso de Mos e o 23,75 % no de Vigo. Tal como explicou a Xunta nun comunicado, a porcentaxe de reserva total do concello determínaa anualmente o Instituto Galego da Vivenda e Solo, con base nos inscritos no Rexistro Único de Demandantes de Vivenda da Comunidade.

Segundo a normativa vixente, os plans xerais de ordenación municipal deberán prever unhas reservas de chan para a vivenda suxeita a algún réxime de protección pública que, como mínimo, comprendan os terreos necesarios para realizar o 30 % da edificabilidade residencial prevista pola ordenación urbanística en chan urbanizable e no urbano non consolidado.