O Concello de Vigo abre este mércores o prazo para pedir as bolsas comedor dos alumnos da cidade, que terán ata o 12 de setembro para solicitalas, co curso escolar xa iniciado. Tal como anunciou o alcalde, Abel Caballero, poderán solicitarse a través da web municipal ou de forma presencial na sede do Concello de 09.00 a 14.00 horas.

O rexedor volveu a criticar á Xunta, indicando que noutras comunidades son os gobernos autonómicos os que conceden estas axudas. Así mesmo, dixo que “non hai listas de espera”, xa que todos os nenos que a soliciten e cumpran cos requisitos, recibirán a bolsa. Todo iso despois de que a Federación Olívica de Asociacións de Pais e Nais de centros escolares de Vigo (Foanpas) criticase fai preto dun mes que o Concello non convocase aínda as bolsas para que os nenos da cidade gocen do servizo de comedor de forma gratuíta, o que fará que ese diñeiro sexa cobrado polas familias “en xaneiro ou febreiro”.

Segundo a asociación, o curso pasado foron convocadas a finais de xuño e as bolsas cobráronse en decembro, obrigando a pais e nais a adiantar o diñeiro do comedor durante catro meses. Algo que moitas familias non se poden permitir. Este ano, a convocatoria non estará dispoñible ata mediados de agosto, dous meses despois que en 2023.