O comité de empresa e a UTE Zonas Verdes de Vigo (formada por Acciona e Civis Global) acordaron este venres ir a unha mediación para tratar de desbloquear a folga, tras 12 días de paro indefinido.
En concreto, esta mañá ambas as partes reuníronse nun encontro no que, segundo explica a CIG, “non se acordaron avances de face a pechar un acordo de convenio”, pero si se pactou ir a unha mediación para tratar de superar o conflito.
“En aras de facilitar unha solución e ante o fracaso da reunión deste venres, valoramos a posibilidade de utilizar o mecanismo que recolle o propio convenio colectivo para a resolución de conflitos e tanto a empresa como o comité aceptamos instar unha mediación”, subliñou a secretaria nacional da CIG-Servizos, Transi Fernández.
Por iso, segundo dixo, o vindeiro luns, día 29, terá lugar a primeira reunión ás 09.00 horas nas dependencias da Inspección de Traballo. Fernández lamentou que a empresa concesionaria de Parques e Xardíns do Concello de Vigo “non movese ficha” ata 12 días despois da folga, “a pesar das evidentes consecuencias que o seguimento maioritario do paro indefinido ten na prestación do servizo”.
Pola súa banda, o concelleiro responsable desta área, Ángel Rivas, criticou o “vandalismo” levado a cabo polos traballadores, aos que culpou de esparcir lixo por toda a cidade, asegurando que a CIG e o BNG “avalan” estes comportamentos.
