A Fundación Provincial Banco de Alimentos de Vigo entregou máis de 705.000 quilos de comida durante o primeiro semestre deste ano, o que supón unha cifra algo inferior (-6,6%) ao mesmo período de 2023, cando repartiu 755.544 quilos.

Tal como informou a asociación, este dato supón unha “cantidade relevante”, tendo en conta que xa desapareceu por completo o Fondo de Axuda Europea ás Persoas máis Desfavorecidas e que, no exercicio previo, supuxo preto de 500.000 quilos de produtos achegados.

Así, durante este primeiro semestre, a Fundación desenvolveu tres Operacións Quilo a pé de supermercado, recadando máis de 141.000 quilos de produtos básicos, o que supón unha “baixada continuada” das doazóns pola carestía dos alimentos.

“A pesar de que a sociedade sempre responde á chamada do Banco de Alimentos, o que comeza a ser unha tendencia é que se doa, si, pero faise na medida que as persoas poden facelo”, indicaron nun comunicado. Durante os seis primeiros meses deste ano, Banco de Alimentos comezou a repartir máis de 65.000 quilos de fletén conxelado procedente dun comiso do servizo de Agricultura e Pesca da Subdelegación do Goberno.

“Parte deste peixe de alto nivel nutricional enviámolo a Bancos de Alimentos de Cataluña e de Asturias, así como aos nosos compañeiros de Ponferrada, Ourense e A Coruña”, engadiron.