O conselleiro do Mar, Anfonso Villares, participou este xoves no consello reitor da Asociación Nacional de Fabricantes de Conservas de Peixes e Mariscos, Anfaco-Cecopesca, onde puxo en valor o traballo da devandita entidade tras coñecer os avances en actividades científico-tecnolóxicas levados a cabo durante o primeiro semestre deste ano. Nun comunicado, a Xunta lembrou o convenio de colaboración asinado entre Anfaco e a Consellería para a promoción e mellora da comercialización de conservas de mar, co fin de impulsar a competitividade do sector e de favorecer o seu crecemento.

O convenio, segundo dixo Villares, foi asinado a principios deste 2024 e grazas a el estanse levando a cabo distintas accións de promoción e difusión da calidade dos produtos do mar transformados. “O obxectivo é intensificar o coñecemento do conxunto da cidadanía sobre eles e impulsar o desenvolvemento do sector nesa materia”, engadiu o Executivo autonómico. Entre outras accións, inclúense diversas iniciativas relacionadas coa sustentabilidade, a transformación dixital, a seguridade alimentaria, a mercadotecnia e o I+D+i.