A Federación Olívica de Asociacións de Pais e Nais de centros escolares de Vigo (Foanpas) protestou este martes pola “falta de limpeza” nos colexios da cidade e pediu máis persoal á concesionaria municipal encargada destes labores. En rolda de prensa, a presidenta de Foanpas, Iria Salvande, lamentou a situación, que se une a outra problemática, e é que moitos centros carecen de conserxe, o que deixa a maioría dos patios “sucios” e con herbas.

Ela explicou que a falta de persoal impide unha boa limpeza por parte dos empregados que si están operativos. Ademais, isto provocou que os encargados de limpar os exteriores tivesen que comezar a realizar labores no interior das instalacións, deixando os patios sen operarios. “É un paso máis no camiño de non coidar os centros escolares. Non hai conserxes, non hai persoal de limpeza, non sei que será o seguinte”, criticou Salvande, asegurando que “nunca se chegou a esta situación”.

Entre outros problemas, e acompañada por representantes de varios colexios públicos de Vigo, a presidenta de Foanpas reivindicou que hai centros con aulas pechadas por unha praga de formigas pola falta de limpeza, referíndose ao Pombal, en Lavadores. “Se non se limpan os exteriores, os insectos entran ás clases, porque chega o verán e as xanelas sempre están abertas”, indicou, engadindo que en moitos centros tamén hai carencia de materiais de limpeza ou mesmo de papel hixiénico, que tamén é responsabilidade da concesionaria.

Por todo iso, xa pediron ao Concello de Vigo que tome medidas respecto desta situación, despois de falar coa concesionaria, a cal lles explicou que hai moitos traballadores de baixa e isto fixo que os empregados de exteriores teñan que facer a limpeza das aulas. “A xente non colle unha baixa, danlla, entón terán que cubrilas”, subliñou Salvande. Ante tales circunstancias, convocaron unha concentración este mércores na Rotonda de Travesía de Vigo, prevendo máis mobilizacións nos próximos días.

CRÍTICAS DO CONCELLO

Pola súa banda, a concelleira de Educación, Olga Alonso, cargou contra a federación de asociacións de nais e pais de Vigo, criticando que “faga política” con este tema e suxerindo que é o BNG quen está detrás da organización.

Ela, nun audio difundido aos medios de comunicación, saíu ao paso das últimas solicitudes dos pais, asegurando que o Concello pediu á empresa responsable que “cumpra co seu labor”. “Nestes momentos, non hai nos centros educativos públicos de Vigo nin problemas de insalubridad nin de inseguridade”, reivindicou, a pesar das peticións das anpas de múltiples centros.