A sección quinta da Audiencia Provincial de Pontevedra, con sede en Vigo, acollerá o vindeiro mércores, día 14, o xuízo contra dous homes acusados de violar a unha moza que coñeceran nunha discoteca da cidade olívica e que se atopaba afectada o consumo de alcol. Segundo recolle o escrito de Fiscalía, que pide para cada un 15 anos de prisión, os acusados tiñan 33 e 19 anos no momento dos feitos, e a agresión remóntase a decembro de 2021, cando ambos coñeceron nunha discoteca de Vigo á nova, que se quedou “descolgada” do seu grupo de amigos.

Tras establecer conversación, e aproveitando que a moza “se atopaba coas súas facultades mentais moi limitadas polo alcol e as drogas consumidas”, convencérona para “ir tomar algo” ao seu domicilio. Unha vez alí, un dos acusados introduciuna na súa habitación e, tras sometela a tocamentos, violou á moza a pesar das reiteradas negativas da vítima. Seguidamente, o outro procesado tamén a violou. Finalmente, un dos acusados deixouna na parada de taxi, onde ela colleu un vehículo ao seu domicilio.

O Ministerio Público considera os feitos constitutivos de dous delitos de agresión sexual, polo que pide para cada un dos acusados 15 anos de prisión máis 10 anos de liberdade vixiada, así como que non poidan manter contacto coa vítima durante 25 anos. Tamén reclama para ela unha indemnización de 15.000 euros por cada delito.