O alcalde de Vigo, Abel Caballero, avanzou que a Asociación de Xuíces e Xuízas para a Democracia planea celebrar o seu congreso anual na cidade olívica. Tras reunirse con representantes da devandita asociación, o rexedor olívico subliñou que a urbe estaría “encantada de recibilos”, aínda que foi prudente, indicando que aínda a decisión non está tomada.

Nun audio difundido aos medios de comunicación, Caballero mostrouse “moi honrado” desta posibilidade, que está “practicamente decidida”, polo que subliñou que cooperará con Xuíces para a Democracia en todo o que sexa necesario. Trataríase do 38º Congreso Anual de Xuíces e Xuízas para a Democracia e, previsiblemente, levaríase a cabo no mes de xuño, como na maioría das edicións pasadas. En 2023 celebrouse entre o 15 e o 16 de xuño en Bilbao, mentres que en 2022 foi en Las Palmas de Gran Canaria o 2 e 3 dese mes.