As organizacións Galiza Nova e Erguer denunciaron este venres a “odisea” que supón para os mozos ter que desprazarse por Vigo en bus urbano, debido ao recorte nas liñas ou as escasas frecuencias en determinadas rutas. Tras manter unha reunión co portavoz municipal do BNG, Xabier Pérez Igrexas, sinalaron que entre os problemas que detectan están as malas conexións con algúns centros, como os que se sitúan na contorna do Meixoeiro, o servizo insuficiente das lanzadeiras ao campus universitario, ou o recorte no servizo nocturno, que pasou de tres a unha única liña.
Así mesmo, tal e como sinalou Nuno Galán, de Galiza Nova, o conflito que afecta ao persoal da concesionaria Vitrasa empeorou aínda máis as condicións do servizo, e trasladou o apoio desta organización ao persoal, á vez que afeou ao alcalde de Vigo, Abel Caballero, que sexa “cómplice” da empresa na “precarización” das condicións de traballo.
Por parte de Erguer, Noa González sinalou que a mobilidade en bus para os mozos é unha “odisea” por falta de frecuencias e, agora, polos continuos “paróns” debidos ás protestas dos traballadores de Vitrasa. Así, reclamou máis lanzadeiras ao campus, mellores frecuencias nas conexións con outros centros de estudo, ou recuperar servizos nocturnos para que os mozos poidan ter un “lecer seguro”.
UN TRANSPORTE URBANO QUE “NON ESTÁ Á ALTURA”
Pola súa banda, o portavoz municipal do BNG, Xavier Pérez Igrexas, lamentou que o servizo de bus urbano de Vigo “non está á altura” dunha cidade de case 300.000 habitantes e cun campus a varios quilómetros do centro. Así mesmo, afeou ao goberno local que manteña a diferenza do 27 % nas bonificacións dos billetes para universitarios con respecto ao resto de estudantes.
Finalmente, volveu a pedir unha “rectificación” da posición do alcalde no conflito de Vitrasa, que “vai camiño de cronificarse” e aludiu á última protesta do persoal nun acto de Abel Caballero. Respecto diso, criticou que o rexedor teña como “única resposta” ao problema de Vitrasa a “provocación de maneira deliberada aos traballadores, aliñándose coa empresa en lugar de escoitar as demandas do persoal”.
