InicioSociedadeO xurado declara culpable ao asasino confeso do hostal de Mondariz, e...

O xurado declara culpable ao asasino confeso do hostal de Mondariz, e ve probada a alteración psíquica e a confesión

Fiscalía e acusación particular manteñen a súa petición de 14 anos de cárcere.

PUBLICADO O

O tribunal de xurado declarou culpable por unanimidade a Miguel Ángel G.M. dun delito de asasinato, por apuñalar ao seu veciño de habitación nun hostal de Mondariz, José Luís F.F., en xaneiro de 2021, e tamén por unanimidade ve probadas as circunstancias atenuantes de alteración psíquica e confesión.

En apenas unhas horas o tribunal popular completou o cuestionario que conforma o obxecto de veredicto, e iso tras un xuízo celebrado na sección cuarta da Audiencia Provincial de Pontevedra en formato reducido, tendo en conta que o propio acusado recoñeceu os feitos e negouse a declarar, polo que as acusacións renunciaron a gran parte da proba prevista.

A confesión do propio procesado, realizada xa o primeiro día da vista, e as declaracións dalgunhas testemuñas, como o sarxento da Garda Civil que instruíu a investigación; a empregada do bazar onde o acusado comprou o coitelo co que matou á vítima; os forenses, que confirmaron a morte por hemorraxia masiva tras recibir “entre 80 e 90 coiteladas”; ou os peritos que explicaron o achado de ADN do acusado nun calcetín da vítima; deixaron pouca marxe para a dúbida ou a interpretación.

Ademais da atenuante de confesión, o xurado estimou probada a alteración psíquica que, aínda que non consta que afectase á capacidade intelectiva do acusado, si puido minguar a súa capacidade de controlar os seus impulsos. Esta circunstancia xa fora recoñecida de inicio polas acusacións, dado que se acreditou que Miguel Ángel padece unha esquizofrenia paranoide e non estaba a seguir o tratamento no momento dos feitos.

Segundo reflicte o veredito, o tribunal popular considera probado que, entre a tarde do 17 de xaneiro e a noite do 18 de xaneiro de 2021, o acusado foi á habitación de José Luís e, co ánimo de acabar coa súa vida, asestoulle “entre 80 e 90” puñaladas (cun coitelo de cociña de 62 centímetros de folla) en abdome, cabeza e costas, sen que puidese fuxir ou defenderse. A continuación trasladou o corpo ata un galpón anexo ao hostal, e “deixouno tirado” ata que foi atopado, o 22 de xaneiro.

O xurado mostrouse contrario á posibilidade de que se lle suspenda a pena de prisión que se lle impoña ou a que se lle outorgue o indulto. Ante este veredicto, tanto a Fiscalía como a acusación particular (que exercen os irmáns da vítima) mantiveron a súa petición de que Miguel Ángel sexa condenado a 14 anos de cárcere, e que se lle impoña a prohibición de achegarse ou comunicarse cos parentes de José Luís por un período de 19 anos. A defensa adheriuse a estas peticións.

ÚLTIMAS

Tres atracadores levaron uns 300.000 euros a punta de pistola do Caixabank de Gran Vía

A Policía Nacional revisa imaxes gravadas polas cámaras e toma declaracións a testemuñas e empregados para atopar...

A remodelación do Museo Massó de Bueu rematará en 2024

O conselleiro de Cultura, Educación, FP e Universidades, Román Rodríguez, visitou este venres o Museo Massó...

O grupo municipal do PP denuncia que o Concello só dea “3 días” aos grupos para analizar a PXOM tras a súa tramitación “opaca”

O PP de Vigo reprochou este xoves que o Concello olívico só dea "tres días hábiles" aos grupos...

Traballadores de Vitrasa saen de novo á rúa para solicitar que a empresa e o goberno local acheguen unha solución

Decenas de traballadores de Vitrasa, concesionaria municipal do transporte urbano da cidade de Vigo,...