Axentes da Policía Local de Vigo rescataron a unha veciña de idade avanzada da cidade, que sufrira unha caída no seu domicilio e que levaba máis de dous días tirada no chan, sen poder levantarse. Segundo informaron fontes policiais, o 092 recibiu unha chamada para acudir a un inmoble da rúa Romil, porque un veciño alertara de que levaba tempo sen ver a unha das moradoras do edificio, unha muller de avanzada idade.

Unha vez no lugar, os axentes chamaron de forma reiterada á porta da vivenda da anciá, e escoitaron un berro de auxilio. Tras contactar con outra veciña que tiña copia das chaves, puideron acceder ao domicilio, onde se atoparon á muller, tirada no chan, mollada e temblorosa.

A anciá puido balbucear que sufriu unha caída tras escorregarse e que vive soa, polo que levaba máis de dous días tirada no chan. A muller refería que se atopaba mareada e tiña unha forte dor de cabeza. Os axentes requiriron a presenza dunha ambulancia e, tras unha primeira asistencia sanitaria, a muller foi evacuada a un centro hospitalario.