A Xunta publicará este mércores o contrato de licitación para a redacción do proxecto básico e de execución do futuro centro de coidados intermedios de Mos, que suporá un investimento duns 5,4 millóns de euros. Precisamente a conselleira de Política Social e Xuventude, Fabiola García, mantivo un encontro este martes coa alcaldesa da devandita localidade pontevedresa, Nidia Arévalo, para revisar o seu contido.
Segundo indica o Goberno galego nun comunicado, este será o primeiro centro destas características en España, xunto ao que se está pondo en marcha en Santiago. Está dirixido a persoas que, tras recibir o alta hospitalaria, seguen necesitando coidados e atención. A idea é garantir a súa rehabilitación completa e evitar así que perdan autonomía ou se agrave a súa situación. O centro contará con 60 prazas e o orzamento estimado é de 5,4 millóns.
García lembrou que o Executivo galego segue profundando nunha maior coordinación sociosanitaria, un dos principais eixos do modelo de coidados en Galicia. Neste sentido, subliñou que os centros de coidados intermedios encherán un oco dentro do sistema que ata agora non estaba a ser atendido.
