O Sindicato Independente de Traballadores (SIT-FSI) revalidou a súa maioría no comité de empresa de Stellantis nas últimas eleccións sindicais, celebradas este sábado, co 61,12 % dos votos, que se traducen en 21 dos 33 delegados que o conforman.

Destas eleccións saíu elixido o comité de empresa para o próximos catro anos, que contará con dous delegados máis que os elixidos en 2022. Dos 33 que o integrarán, 29 foron para o Colexio de Especialistas e non Cualificados e catro para o de Técnicos e Administrativos, segundo recolle a propia empresa.

UGT foi a segunda organización sindical en número de votos (17,9 %) e a única que conseguiu aumentar o número de delegados, que quedará en seis ao sumar dous con respecto ao anterior comité. Séguenlle a Central Unitaria de Traballadoras (CUT), con tres delegados e o 9,16 % dos votos, e Comisións Obreiras (CCOO), con outro tres delegados e o 8,68 % das papeletas.

A CIG é o único sindicato que se quedou sen representación, do mesmo xeito que nas últimas eleccións, ao obter o 3,14 % dos votos. Nestas eleccións exerceu o seu dereito ao voto o 95 % do censo electoral, conformado por un persoal de 6.200 electores. Constituíronse un total de 29 mesas de votación, 11 delas nas quendas de fin de semana e noite.