A segunda xornada competitiva do Marisquiño arrincou este sábado coas probas clasificatorias para a final do Dirt Jump e cos adestramentos do Descenso MTB, en categoría masculina e feminina, que culminará esta tarde coa celebración da final desta proba que percorre a zona vella de Vigo con inicio no Castro e final no peirao do Berbés.

En Samil durante a mañá celebráronse adestramentos en Skate, BMX, Break Dance e Flatland e pola tarde terán lugar probas clasificatorias en todas estas disciplinas para as finais de mañá. Na zona do Naútico durante todo o día celébranse partidos eliminatorios de Basket 3×3 tamén para definir os finalistas de mañá en categoría masculina e feminina.

Tamén son protagonistas durante esta segunda xornada as Batallas de Gallos pola tarde no escenario de Porta do Sol, e concertos pola noite novamente en Samil coas actuacións de J. Curto, Oddliquor, Albany, Clara! e Antídoto. Ademais, na zona do Naútico atópase o muro onde o graffitero Miedo 12 mostra a súa arte. Na xornada do venres rexistrouse unha gran afluencia en todos os circuítos e tamén nos concertos nocturnos no Escenario Vibra Mahou de Samil.

En total, as inscricións de deportistas para esta edición do Marisquiño roldan as 630, con presenza de grandes deportistas internacionais como Dawid Godziek (actual número 2 do ranking mundial de Dirt Jump), Daniel Dhers (subcampión olímpico de BMX) ou os skaters Ivan Monteiro, Danny León, Keet Oldenbeuving e Angelo Caro, entre outros.

DAWID GODZIEK LIDERA O DIRT JUMP

Durante a xornada matinal do sábado tamén tivo lugar a proba clasificatoria do Dirt Jump que determina a orde de saída para a final prevista para a tarde do domingo. O polaco Dawid Godzie, actual número 2 do mundo nesta disciplina, liderou a clasificación, seguido polo sueco Felix Törnqvist e polo vigués Miguel Guerreiro “Carolo”. O propio alcalde de Vigo, Abel Caballero, comentou o “excepcional” da edición de 2023 do Marisquiño, “con máis xente que nunca no seu primeiro día”.