O sindicato CUT volveu a denunciar que o parque de bombeiros municipal de Coruxo volveu a estar pechado pola falta de persoal, algo que xa ocorreu varias veces nos últimos tempos.
Nun comunicado, o sindicato detallou que durante 24 horas a cidade de Vigo conta con 12 bombeiros “dos 20 mínimos que debería ter”. Deles, apunta, dous son bombeiros-condutor, “polo que os máis de 20 vehículos cos que conta o servizo van estar inutilizados”.
En concreto, indica que só poden facer fronte a emerxencias no vehículo de primeira saída e a escaleira de rescate en altura. “A seguridade de novo da cidade e dos bombeiros volve estar no aire grazas ao deixamento municipal”, denuncia.
Segundo o sindicato, “parece ser” que o Concello quere contratar a 11 interinos para cubrir as vacantes, “pero tarde e mal”. “Esta situación viñámola denunciando hai meses e fixeron caso omiso, agora vai chegar tarde porque como moi pronto estarán a traballar no servizo estes novos compañeiros dentro de tres meses”, reprocha.
Agora, a sección sindical da CUT expón a denuncia penal polo “reiterado deixamento nas obrigacións en prevención de riscos laborais, así como da obrigación na protección dos cidadáns da cidade de Vigo”.
