O director da Axencia Europea de Cooperación Transfronteiriza (AECT) Rio Minho, Uxío Benítez, trasladou este luns o seu rexeitamento público á decisión de repor os controis nas fronteiras entre Galicia e Portugal con motivo da celebración das Xornadas Mundiais da Mocidade, do 1 ao 6 de agosto en Lisboa, e que inclúen a visita do Papa Francisco.

Benítez pediu aos Gobernos de España e Portugal que aclaren en que consistirán as medidas que se van a adoptar “para evitar a alarma social” que xa se viviu durante os peches de fronteiras na pandemia ou en 2017, coa visita do Papa a Fátima.

Segundo sinalou, o peche de 2020 de practicamente todos os pasos fronteirizos no sur de Galicia, obrigou a traballadores transfronteirizos a facer rodeos de quilómetros para acudir aos seus postos, ademais doutros problemas sociais para veciños que utilizan servizos e equipamentos a ambos os dous lados da fronteira.

Uxío Benítez sinalou que, aínda que é comprensible a necesidade de seguridade, hai que establecer “un sistema sen barreiras” que impacte “o mínimo posible” na vida diaria dos veciños deste territorio.