Os avances nos traballos na autovía Tui-A Guarda entre as ligazóns da A-55 e o polígono de Areas obrigarán a pechar un tramo da estrada entre Vigo e a fronteira portuguesa esta madrugada.
En concreto, a afectación ao tráfico levará a cabo entre os puntos quilométricos 29+100 e 30+600 da A-55 a partir das 22,00 horas deste mércores e ata as 06,00 horas do xoves, cando quedará restablecida a circulación.
“Este corte é necesario para proceder á montaxe do segundo van de vigas metálicas do paso superior en forma de glorieta, sobre a autovía, co fin de poder dar servizo aos ramais, no tronco da autovía e a conexión coa N-551”, explicou o Goberno galego nun comunicado.
A Xunta subliñou que o obxectivo é poder dar servizo a ambos os sentidos de circulación polo itinerario alternativo. Desde a saída 29 sentido Portugal usarase a estrada autonómica PO-340, incorporándose á N-550 e posteriormnete á N-551, sendo o mesmo percorrido en sentido O Porriño, pero á inversa. Todo isto implica un tempo de entre 8 e 10 minutos.
