A Confraría de Redondela volverá extraer vieira na enseada de San Simón dous anos despois, cunha campaña de catro días, entre o 27 e o 30 de marzo, e unha previsión de capturas de 4.800 quilos.
Esta campaña será levada a cabo por tres embarcacións do depósito redondelano, con tope de 400 quilos por barco e por día. Nesta ocasión as descargas faranse no porto de Vigo, entre as 13,00 e as 14,00 horas.
No caso destas capturas, a confraría traballará en cooperación coa nova planta evisceradora autorizada da empresa Artesa Rías Baixas, en Barro, sendo os primeiros en eviscerar vieiras con eles.
A confraría trasladou expectativas “positivas” e esperan que eses días de actividade confirmen a recuperación do bivalvo e que “se poida recuperar a extracción deste produto tan característico de Galicia de forma máis constante para futuras campañas”.