Os casos activos de coronavirus en Galicia continúan á alza e alcanzan as 4.779 infeccións –383 máis nas últimas 24 horas–, mentres que os contaxios volven superar o medio milleiro, 514 –59 menos–. A presión hospitalaria tamén se incrementa ata as 114 hospitalizacións –dez máis–, así como a taxa de positividade, que marca un 6,98%.

Segundo os datos publicados na mañá deste domingo pola Consellería de Sanidade con rexistros ata as 18,00 horas deste sábado, aumentan a 21 os pacientes ingresados en UCI pola covid en Galicia –seis máis–, e a 93 as persoas hospitalizadas noutras unidades –catro máis–.

Por áreas sanitarias, a presión hospitalaria aumenta en seis das sete, e só se estanca na de Lugo. O maior incremento en hospitalizados en UCI rexístrao a área de Vigo, onde hai seis pacientes en críticos –catro máis–, aínda que 20 en unidades convencionais –dous menos–. 

As infeccións activas ascenden de novo nas sete áreas sanitarias galegas, coa de Ourense á cabeza (+129), seguida pola de Vigo (+123), Pontevedra e O Salnés (+40), A Coruña-Cee (+38), Ferrol (+23), Santiago e Barbanza (+17) e Lugo (+13).

Deste xeito, con máis casos colócase a de Vigo, con 1.325; seguida da de Ourense, con 1.263; A Coruña e Cee, con 674; Lugo, con 448; Santiago e Barbanza, con 402; Pontevedra e O Salnés, con 420; e á cola continúa a de Ferrol, con 247. 

Segundo os últimos datos actualizados na tarde deste pasado xoves polo Ministerio de Sanidade, Galicia conta cunha taxa a 14 días de 148,12 casos por 100.000 habitantes, mentres que a media do Estado español ascende a 171,68.

En canto á taxa de positividade das probas PCR –número de infeccións detectadas cada 100 test–, aumenta lixeiramente ata o 6,98%, tras rexistrar un 6,41% o sábado. Por iso, mantense por encima do limiar do 5% que fixa a Organización Mundial da Saúde (OMS) para dar por controlada a pandemia.