A Policía Local de Mos detivo na última semana a dous homes sobre os que pesaba senllas ordes de arresto emitidas pola autoridade xudicial.

Segundo informa o Concello nun comunicado, o primeiro deles tratábase dun home de 45 anos de idade que tiña unha orde de ingreso en prisión emitida polo Xulgado do Penal número 1 de Pontevedra.

Tras unha investigación para determinar o seu paradoiro, foi localizado e detido en cumprimento do mandato xudicial.

Pola súa banda, en colaboración coa Garda Civil, tamén se detivo a outro home, de 52 anos, cunha orde de arresto e personación emitida por un xulgado do Porriño.

O goberno local destacou o labor dos axentes e a “estreita” colaboración coa Benemérita.