A catedrática emérita da Universidade de Maine e filóloga Kathleen March ingresará na Real Academia Galega (RAG) como membro de honra o sábado 23 de setembro. Segundo informou a institución, a filóloga, nacida en Rochester en 1949, autora de traducións e estudos “fundamentais para a proxección internacional da cultura galega” e fundadora da Galician Studies Association, lerá un discurso titulado ‘Máis aló do manifesto’ nunha cerimonia que terá lugar no Balneario de Mondariz, en Pontevedra.

A Academia volverá celebrar 103 anos despois da recepción de Ramón Cabanillas, segundo recalca, a entrada dun novo membro na corporación neste espazo convertido en “un auténtico centro de promoción e mecenado da cultura galega”.

O auditorio Infanta Isabel do Balneario de Mondariz acollerá a partir das 17.30 horas a sesión académica, aberta ao público ata completar a capacidade do salón e que temrinará cun concerto de Amancio Prada.

A directora da Sección de Lingua da Real Academia Galega, Rosario Álvarez será a encargada de dar resposta ao discurso da profesora estadounidense. A autora chegou por primeira vez a Galicia no ano 1975 para investigar a poesía de Manuel Antonio, coautor do manifesto ‘Máis aló’ (1922), evocado no título do ensaio co que ingresará na RAG.