A Plataforma de afectados polo vial de Beade, AVIBE, vén de informar de que mañá mércores asistirán ao pleno “nun novo intento” de ser escoitados por Abel Caballero. Os afectados levan 14 meses intentando ser recibidos polo rexedor para poder explicar as consecuencias do vial nas parroquias e familias afectadas.

“A actitude do alcalde ante esta situación é incomprensible e os veciños non entenden que presuma de recibir a todo o mundo e os ignore ante un vial que vai expropiar e destruír as súas casas”, explican. Ademais, mañá AVIBE preguntará tamén polo estado das alegacións, xa que foron presentadas preto de 3.000 ante o vial PO-010. “Todas elas seguen a día de hoxe sen resposta por parte do Concello”, conclúen.