O sábado remataron en Vigo as xornadas “Democracia secuestrada: ameazas globais e autodefensa”, organizadas por ECOAR. O evento serviu para analizar a “complexa situación” na que se atopan os sistemas democráticos na actualidade, así como para presentar o novo proxecto de organización.
Durante catro días Miquel Ramos, Erika González, Carlos Taibo, Proyecto Una, Enrique del Teso e Alfons Pérez explicaron como se conforman as relacións de poder e contrapoder nos sistema-mundo actual. Ao final das intervencións desenvolveuse un debate final onde o público puido compartir a súa ollada e as súas inquedanzas sobre cada unha das cuestións abordadas.
O evento serviu para realizar unha radiografía dos problemas e amaeazas aos que se enfrontan as democracias actuais, ao tempo que se deron a coñecer proxectos e posibles estratexias coas que facerlles fronte.
As xornadas contribuíron a analizar a través de casos específicos e liñas teóricas, cales son as dinámicas, ferramentas e discurso tanto das corporacións e da extrema dereita como dos movementos e resistencias que lles fan fronte.
