O concelleiro do BNG en Vigo, Xabier P. Igrexas, criticou o “sectarismo” do alcalde, Abel Caballero, por designar á vicepresidenta primeira e ministra do Goberno central, Nadia Calviño, como pregoeira do Día de Galicia na cidade.
Neste sentido, o nacionalista lamentou que se elixiu de forma “unilateral” a Calviño, a pesar de “carecer de vínculos coa cidade”. “O alcalde ten que deixar de confundir Vigo co seu partido. O único motivo para esta designación unilateral é que forma parte dun goberno do PSOE”, engadiu Igrexas.
“Abel Caballero ten que explicarlle á cidade cales son os motivos e os méritos que acreditan a designación de Nadia Calviño como pregoeira do Día de Galicia en Vigo”, reivindicou o concelleiro nacionalista.
Así mesmo, criticou o uso “partidista” dos actos institucionais do Concello de Vigo por parte do PSOE e lamentou que se atrase o acto do 25 de xullo ata o 12 de agosto, co pretexto das altas temperaturas (a pesar de que se esperan unhas máximas de 25 graos en Vigo).
“Coma se fose algo insólito que faga calor na nosa cidade a finais de xullo”, sentenciou Xabier P. Igrexas, asegurando que este atraso se debe á necesidade de encaixar na axenda da ministra o acto.
