O deputado do BNG no Congreso, Néstor Rego, reclamou este sábado un “maior investimento” por parte do Goberno para a “mellora” da rede de abastecemento de auga da cidade de Vigo e a súa comarca.

Nun comunicado, o BNG alude ao transvasamento do río Verdugo na súa confluencia co río Oitavén. Para esta actividade, indica, contémplase a “realización de obras de gran envergadura”, accións sobre as que piden información e auguran que afectarían “gravemente” á economía e medio ambiente da zona.

“O BNG da comarca de Vigo manifestou o seu rexeitamento á execución dun transvasamento ou a construción de novos encoros, ao mesmo tempo que puxo sobre a mesa alternativas viables para executar un Plan de Xestión Eficiente da auga”, sinalou o deputado. Ademais, tamén destacou a “necesidade” de mellorar o abastecemento da zona, pero sempre “tendo en conta o impacto ambiental e ao ecosistema”.

REDUCIÓN DAS PERDAS UN 30%

Por outra banda, Néstor Rego considerou “imprescindible” debater xunto ás administracións afectadas sobre a xestión hidrográfica e o aproveitamento sustentable dos recursos hídricos. Doutra banda, o Bloque aposta por “mellorar a eficiencia dos sistemas de captación, almacenamento e abastecemento da auga”. As actuacións ideadas polo BNG estiman que se poden reducir as perdas de auga ata un 30%.

“Consideramos pertinente que o Ministerio reflexione sobre este tipo de actuacións de gran impacto, que conta cun total rexeitamento social e político en Galicia.