O PP rexistrou no Congreso unha pregunta oral e escrita ao Goberno central para que aclare se vai indultar o ex alto funcionario do Concello de Vigo que foi condenado, nunha sentenza confirmada polo Tribunal Supremo, a máis de cinco anos de prisión por favorecer a contratación dunha cuñada da tenente de alcalde da cidade e presidenta da Deputación de Pontevedra, Carmela Silva, por un traballo que non realizou.

En concreto, os deputados populares galegos interpelarán ao Executivo de Pedro Sánchez se concederá o indulto a este home que, no escrito remitido ao Ministerio de Xustiza, lembra que dedicou a “práctica totalidade” da súa vida a defender os dereitos dos traballadores e que é afiliado á UGT e ao PSOE, entre outros asuntos.

Neste contexto, o deputado do PP por Pontevedra Diego Gago asegurou este sábado que, se finalmente o Goberno adopta esta medida, “xa non sería un indulto, sería un insulto á democracia, á separación de poderes e a todos os vigueses e viguesas honrados que reciben unha nómina a final de mes por ir traballar”.

De feito, aseverou que se trataría dun “novo indulto político” comparable, ao seu xuízo, co que aprobou esta semana o Consello de Ministros para a presidenta da asociación Infancia Libre, María Sevilla, unha “protexida de Podemos” condenada a dous anos e catro meses de prisión por subtracción de menores e á perda da patria potestade do seu fillo durante catro anos.

Así mesmo, Diego Gago lamentou que no ‘caso cuñada’ nin a presidenta da Deputación de Pontevedra nin o alcalde de Vigo, Abel Caballero, dean “ningún tipo de explicación nin asumir responsabilidades”.