InicioPolíticaSó o PP vota en contra das mocións do pleno de Vigo...

Só o PP vota en contra das mocións do pleno de Vigo contra os “recortes” da Xunta en Atención Primaria

Os concelleiros de PSOE, Marea e BNG deron o seu apoio.

PUBLICADO O

- Advertisement -

O pleno da Corporación Municipal de Vigo aprobou este mércores, cos únicos votos contrarios do PP, dúas mocións para reclamar á Xunta medidas de reforzo da Atención Primaria, que sofre recortes desde hai anos por “decisión política” e ten unha situación “crítica” por motivos estruturais.

Así, os concelleiros de PSOE, Marea de Vigo e BNG deron o seu apoio a unha moción presentada polo grupo de goberno na que se denunciaba que os problemas da atención sanitaria e, en concreto da Atención Primaria, da área de Vigo responden a unha situación “estrutural, non conxuntural”, agravada pola pandemia de Covid.

Respecto diso, o portavoz socialista, Carlos López Font incidiu en que a área de Vigo foi “un campo experimental” dos recortes da Xunta, e referiuse á última medida adoptada na Atención Primaria: a “orde política de atender só casos Covid e urxencias” nos primeiros días de xaneiro, e “só na área de Vigo”.

Para López Font, mentres todo isto ocorre, o conselleiro de Sanidade, Julio García Comesaña, “está máis preocupado pola situación do PP que pola xestión da sanidade”.

“ESCUSA DA COVID”

Na mesma liña, Marea de Vigo lamentou que o goberno galego usou a “escusa da Covid” para implementar medidas de recorte e para tomar “represalias” contra a Atención Primaria de Vigo, pola dimisión colectiva de xefes de servizo do ano 2019.

Tamén o concelleiro do BNG, Xabier Pérez Igrexas incidiu na necesidade de dotar de medios a Atención Primaria, para frear a actuación privatizadora do goberno autonómico, e recalcou que os investimentos neste servizo público esencial son unha cuestión de “vontade política”.

O pleno de Vigo tamén deu luz verde a outra moción na mesma liña, unha presentada precisamente por Pérez Igrexas, na que demanda actuacións para aumentar o orzamento sanitario, incrementar os persoais de profesionais, dotar á Primaria dunha carteira de servizos que permita ofrecer unha atención integral á poboación, dotar de máis medios a PAC de Pizarro e construír novas infraestruturas sanitarias na cidade.

“DEMAGOXIA”

As mocións foron aprobadas co voto favorable de PSOE, Marea e BNG, mentres que o PP votou en contra, alegando que os posicionamentos expostos están cheos de “mentiras e falsidades”.

Así o manifestou a concelleira Teresa Egerique, que tachou de “demagoxia” o contido das mocións porque é “rotundamente falso” que a Xunta queira “desmantelar” a sanidade pública e a Atención Primaria.

Tras lembrar que a pandemia “freou” a atención “en toda España”, defendeu que o goberno galego fai unha “aposta decidida” pola sanidade pública con máis investimentos e plans de actuación, como o que servirá para “mellorar” a Atención Primaria. “Outra vez volven usar a sanidade para facer demagoxia”, censurou, e insistiu en que as dificultades da Primaria repítense tamén noutras comunidades por falta de médicos.

ÚLTIMAS

Stellantis volverá parar parte da súa produción durante dúas quendas por falta de pezas

A fábrica viguesa do grupo automobilístico Stellantis volverá parar parte da súa produción durante a quenda...

Arrinca o festival TAC! de arquitectura coa presentación dunha gran batea en pleno centro de Vigo

A céntrica Porta do Sol de Vigo acolleu este xoves a presentación do pavillón...

Detido por ofertar contratos de traballo falsos a estranxeiros

A Policía Nacional detivo esta semana a un home, dedicado á repartición de mercadorías...

Stellantis Vigo condenada por vulnerar a “liberdade sindical” da CUT

O Tribunal Supremo inadmitiu o recurso de casación presentado por Stellantis Vigo e declarou...