O alcalde de Vigo, Abel Caballero, esixiu este venres “explicacións” ao presidente da Xunta, Alberto Núñez Feijóo, despois de que o proxecto presentado para a designación da Ribeira Sacra como Patrimonio da Humanidade pola Unesco fracasase”, á vez que anunciou que o goberno vigués relanzará “con moitísima forza” a candidatura “gañadora” das Illas Cíes.
O rexedor vigués afirmou que “sempre” defendeu que “primeiro tiña que lanzarse Ribeira Sacra” neste proceso, e despois a candidatura das illas Cíes (aínda que a Xunta se adiantou anunciando unha candidatura das Illas Atlánticas). “Pero claro, a Xunta presentou o proxecto de Ribeira Sacra e fracasou, foi rexeitado, e quero que Feijóo fale, ten que explicar que pasou. O conselleiro dá case igual o que diga despois dese fracaso”, proclamou.
Segundo apuntou Caballero, a Unesco fixo un informe “moi negativo” sobre a candidatura de Ribeira Sacra e agora o presidente do Goberno galego debe explicar “que fixeron mal”.
A principios de xuño, o Goberno central e a Xunta acordaron, nunha reunión entre o conselleiro Román Rodríguez e o embaixador de España ante a Unesco, Juan Andrés Perelló, aprazar a presentación das candidaturas tras un informe por parte do Incomos (órgano asesor da Unesco) que cuestiona algúns aspectos do proxecto.
Nese momento, o conselleiro de Cultura, Educación e Universidade trasladou que se trata dun “adiamento estratéxico” entre, outras cuestións, para “reforzar” dita candidatura, e encadrouno dentro da “normalidade”, xa que outras iniciativas que optaban ao recoñecemento tamén o fixeron no seu momento, logrando posteriormente ser Patrimonio da Humanidade.
RELANZAMENTO DE CÍES
En calquera caso, e tras esixir esas explicacións a Feijóo, o alcalde de Vigo confirmou que retomará a candidatura das illas Cíes, que será presentada para formar parte da lista indicativa (o paso previo antes de formalizar a candidatura ante a Unesco).
Respecto diso, volveu acusar á Xunta de presentar outra candidatura, a das Illas Atlánticas, co único fin de bloquear a iniciativa do Concello, e advertiu de que “xa todo o mundo sabe que a candidatura de Illas Atlánticas é unha candidatura perdedora”. “Presentárona para parar a de Cíes, foi unha operación antiVigo“, sentenciou.
Abel Caballero cuestionou que a proposta da Xunta poida saír adiante, habendo “un inmenso vertedoiro” nas próximidades de Sálvora (un depósito residuos de dragados portuarios acumulados desde hai anos), ou incluíndo a illa de Ons, cuxos habitantes “non queren ser Patrimonio da Humanidade”.
Por contra, vaticinou que o informe da Unesco sobre Cíes “vai ser positivo”, e insistiu en que, desde que se anunciou a candidatura da Xunta para Illas Atlánticas, “Feijóo non fixo nada, só parar a de Cíes”.
