O alcalde de Vigo, Abel Caballero, arremeteu este mércores novamente contra o presidente da Xunta, Alberto Núñez Feijóo, a quen afeou que apunte ao Banco de España sobre a fusión das caixas galegas, cando foi unha operación que el “obrigou” e “sabendo que acabaría en quebra”.

Así o manifestou o rexedor socialista, quen aseverou que “o Banco de España non quería a fusión” e foi o propio Feijóo o que “coaccionou” ás entidades, especialmente a Caixanova, e “presionou” ao órgano supervisor para que avalase unha integración que daría lugar a unha “caixa solvente e equilibrada”. “Onde está esa caixa?”, cuestionou o alcalde de Vigo.

Abel Caballero remitiuse ás declaracións feitas públicas polo propio Feijóo ao longo de 2009 e 2010 en relación á fusión das caixas, e lembrou que o presidente galego “instou” as caixas a unirse, e chegou a manifestar que a Xunta faría “o necesario” para que a operación “frutificase”.

Agora, incidiu o alcalde olívico, un xuíz da Audiencia Nacional sinalou que Caixanova non fose intervida de non ser obrigada á fusión, o que constata que a operación foi unha “nefasta decisión política” de Feijóo, con “unha profunda visión antiVigo e antiCaixanova”.

“PRESIÓN” AO BANCO DE ESPAÑA

Así mesmo, tras insistir en que o presidente galego “mentiu a todos os galegos” sobre a situación financeira das dúas entidades, instou a Feijóo a “non mirar para outro lado, para o Banco de España”. “Vostede presionou ao Banco de España para que se fixese a fusión”, engadiu Caballero.

O rexedor olívico tamén lembrou que a propia vicepresidenta económica do Goberno en 2010, Elena Salgado, fixo referencia á “interferencia política” da Xunta nese proceso, perseguindo unha integración que non querían as caixas. Sabía que isto conducía á quebra, é posible que non todos o soubésemos, pero el si, porque tiña o informe de KPMG”, concluíu Abel Caballero.