O alcalde de Vigo, Abel Caballero, criticou este xoves que a Axencia Galega de Infraestruturas, dependente da Xunta, licitou as obras dun aparcadoiro público gratuíto para o Hospital e o Centro de Saúde de Conxo, en Santiago de Compostela, mentres que se nega a venderlle unha parcela ao Concello olívico para habilitar prazas de estacionamento á beira do Hospital Álvaro Cunqueiro.

O rexedor denunciou que, mentres a Xunta vai facer “pagar” un aparcadoiro gratuíto para esas dotacións sanitarias, en Vigo “nin sequera” vende unha parcela pedida polo Concello para facer prazas de aparcodoiro. “A Xunta ten distintas varas de medir. Vigo ten que pagar aparcadoiro no Álvaro Cunqueiro, e en Santiago fan un pago pola Xunta”, incidiu.

A Xunta de Galicia, pola súa banda, saíu ao paso das acusacións, desmentindo ao alcalde, puntualizando que as obras de Santiago consisten na “reposición” dunhas prazas de aparcadoiro que se perderon cando se executaron uns traballos de humanización nese barrio, vinculados ao Camiño de Santiago.

Fontes do Goberno galego tamén precisaron que o Sergas cedeu unha parcela da súa titularidade para habilitar esas prazas de aparcadoiro “para o uso dos veciños”, e que “en ningún caso” está vinculada ao centro hospitalario.

Finalmente, a Xunta lembrou que, en 2020, está previsto o investimento de 700.000 euros (o “dobre” que o custo da obra en Conxo) para realizar melloras no aparcadoiro do hospital vigués Meixoeiro.